CARPON

STATUS

Wanci beuki nyerelek ka tengah peuting. Hanca pagawean teh tacan anggeus keneh wae geuning. Sakitu panon geus rada belel molototan layar komputer ti saprak beres solat Isya. Ah, mending tunda we heula da teu kuat geus cangkeul. Jeung geus rada teu purun deuih. Isukan rek diteruskeunna. Pagawean mah moal nunuturkeun ieuh.

Goledag awak ngagoledag kana kasur. Ragamang leungeun nyokot HP nu geus meunang ngecas. Sisinarieun geuning mani simpe teu aya nu ngasms-sms acan. Ka marana nya si Andri, si Otong nu sok rajeun pisan ngiriman sms ngaco nu meunang nga-forward tea. Sakapeung sok pikasebeleun tah smsna teh. Tapi nya lumayan oge ari nu pikaseurieun mah, teu burung sok hayang ngabarakatak. Nu masih diinget ku kuring salah sahiji smsna teh kieu:

Hayu urang nyandak pelajaran ti alam Ghoib:

TUYUL, leutik-leutik geus bisa ngala duit sorangan…. MANDIRI.

KUNTILANAK, susah senang tara eureun-eureun seuseurian hihihihi…..SELALU OPTIMIS.

POCONG, bajuna angger tara gonta-ganti…. SEDERHANA.

NYI RORO KIDUL, sanajan di laut tara make bikini….SOPAN.

JAELANGKUNG, datang tak dijemput, pulang tak diantar…..TARA NGAHESEKEUN BATUR.

Tuh, pan aya-aya wae smsna teh.

Ari si Enung, si Olin jeung si Yanti mah sok getol ngiriman sms mutiara teuing meunang ti mana tah. Nu puguh mah eusina sok munel pisan loba pulunganeunana. Ari smsna nu alus mah tara langsung dipupus, sok di-save heula ngarah aya teang-teangeun. Da lumayan atuh mun keur teu parurun nanaoun, ari macaan sms mutiara nu eusina motivasi mah, geuning sok rada sumanget deui. Geura we titenan ieu eusi sms nu dikirim ku Olin:

Daun yang jatuh tak pernah MEMBENCI angin.

Bahwa hidup harus menerima… dengan penerimaan yang INDAH.

Bahwa hidup harus mengerti… dengan pengertian yang BENAR.

Bahwa hidup harus memahami….. dengan pemahaman yang TULUS.

Tak peduli lewat apa penerimaan, pengertian dan pemahaman itu datang….

Tak masalah meski lewat kejadian yang SEDIH dan MENYAKITKAN…. 

Kitu geuning, rupa-rupa pisan tingkah paripolah babaturan teh. Tapi nu puguh mah bungah we asa haneuteun boga babaturan teu weleh ngahubungan sanajan maranehna boga kasibukan sewang-sewangan oge. Ayeuna sms we kitu ku kuring? Ah, tapi karunya geus peuting teuing bisi geus sarare. Mending muka pesbuk, ongkoh geus lila tara muka-muka.

Truk trek truk trek, leungeun mencetan tombol HP. Berebet kakaca pesbuk muka. Euleuh geuning mani loba nu menta dikonfirmasi hayang berteman. Jadi memeh nempoan status batur mending konfirmasian we heula, karunya…

Beres ngonfirmasian, kuring macaan status nu geus aya. Rek ngomentaran mun aya nu rame mah. Tapi tepi ka kakaca handap, asa teu aya nu perlu dikomentaran. Malah asa loba keneh nu lebay batan nu serius mah.  Atuh mending nyieun status we ah, hayang nyaho aya nu ngomentaran ta henteu engkena.

Kuring ngahuleng sajongjonan. Neangan ide keur nyieun status. Jorelat aya ide, asa alus yeuh mun ditaekkeun kana pesbuk sabab ieu mah datangna tina hate, estuning lain ukur lebay atawa hayang gagayaan. Terektek we kuring nulis…

Aku punya cinta

Yang dengannya aku hidup…

Dengannya aku kuat…

Dengannya aku tertawa, menangis,berbagi…

Dengannya aku berjuang…untuk sesuatu yang ingin kuraih…

Dengannya tiadaku menjadi ada…

Dengannya mustahilku menjadi mungkin…

Dengannya pula aku akan mati….

Menemui cinta sejatiku….

Beres. Klik kuring mencet tombol, bagikeun… Keun hayang nyaho aya nu komentar atawa minimal ngaklik suka ta moal. Tapi da ketang, teu hayang-hayang teuing dikomentaran. Ieu mah curhat we, ngedalkeun eusi hate. Meungpeung keur rada reugeujeug hehehe…..

Bari nungguan komentar, kuring mukaan heula google. Neangan berita naon nya? Ah enya, hayang nyaho mobil esemka ah. Lain nanaon, kuring ngarasa reueus, barudak SMK urang geus mampuh nyieun mobil sorangan. Pan hebat lin?

Dina berita pangluhurna eces ngajeblag: “Mobil esemka telah mengundang apresiasi dari banyak pihak. Indent mobil ini telah mencapai 5000 unit. Pemerintah diharapkan untuk mengakomodasi dan memfasilitasi agar mobil ini bisa segera diproduksi secara massal.”

Tuh, geuning mani geus loba kitu nu hayang make mobil esemka. Geus sakuduna pamarentah ngajungjungkeun ka produksi hasil karya budak bangsa sorangan. Ulah tepi ka aset jalma Indonesia nu palinter teh kalah ka dimangpaatkeun ku luar nagri sabab sasatna dimomorekeun di nagara sorangannana mah.

Ti mobil esemka, tuluy mukaan berita kana pesawat nu sarua keneh buatan budak SMK, ngan ieu mah di Bandung. Tapi eusi beritana asa rada matak heneg saeutik, pajarkeun teh “Pesawat buatan anak-anak SMK di Bandung telah berbulan-bulan teronggok menunggu izin terbang yang tak kunjung didapatkan.”

Haruh…., kumaha atuh masalah idin wae ge mani hese.  Kuduna mah tuluy dibere fasilitas pikeun kamajuan tehnologi bangsa teh ambeh teu beuki jauh tinggaleun ti bangsa deungeun. Bere peluang barudak palinter nu bisa ngangkat ajen bangsa di mata internasional. Ajen bangsa nu geus rawing dijejewet disasaak ku koruptor. Pan reueus lin mun urang milu makalangan dina hal tehnologi di antara nagara-nagara di dunya. Entong dina masalah korupsi we bangsa urang meunang juara teh.

Teuing kumaha tah korupsi bet mani beuki meuweuh we ti taun ka taun. Para koruptor siga geus leungit kaera. Beuki pagede-gede nilep duit nagara duit rahayat. Perkara gampang KPK mah. Hukum ceuk manehna bisa dibeuli. Korupsi milyar-milyar malah triliun-triliun tapi dihukum panjara paling ukur lima taun dalapan taun.  Di  panjarana teu susah teu sing keur maranehna koruptor nu loba duit ladang maling duit rahayat mah. Ruang panjara nu kuduna mah nya heureut nya sumpek, bisa disulap jadi rohangan mewah satarap hotel bintang lima. Malah aya nu make salon pribadi dokter pribadi. Atawa mun hayang pelesir ka luar nagri gampang deuih. Teuing kumaha carana nu jelas mah aya nu bisa jalan-jalan ka pantai, aya oge nu bisa lalajo tenis di stadion, jeung rea-rea deui kalakuan para koruptor nu araraheng.

Ah, rieut mikiran koruptor, mending balik deui we kana pesbuk. Klik, asup ka beranda. Aeh geus aya nu ngomentaran geuning kana status nu bieu tea. Padahal can kungsi sapuluh menit. Tetela batur ge aya nu keur on line dina mangsa janari ngagayuh ka isuk jiga kieu. Teu kurang ti limaan nu ngomentaran, dua urang nu ngacungkeun jempol alias suka. Hag siah, payu geuning status teh. Cikan, naon wae komentarna….

 Komentar pangluhurna ti Yoga Van Sukoco, babaturan SMP nu geus lila cicing di Bandung. “Satuju…….”, ceuk manehna ukur sakitu teu kurang teu leuwih.

Handapeunna aya Abina Adzkia, komentarna singget deuih, ukur “deuuu….. nu gaduh cinta….”